أندريس إنييستا لوخان ، أو كما يعرف بالرسام ، كوني كنت مشجع لنادي ريال مدريد لفترة كبيرة فكنت بشكل او بآخر مش بعرف أحب أي لاعيب بيلعب في البارسا لكني ومع ذلك مقدرتش أكره أندريس انييستا ، معرفتش ، أندريس انييستا من صفوة لاعبين القرن الواحد والعشرين وأحد أمهرهم على الإطلاق ، مشاهدته متعة للعين..
لو حاولت تحلل اللي بيعمله إنييستا بالكورة هتحس بالبساطة وإن الكورة سهلة جداً لكن دا مش عشان الأمر بسيط أبداً الحقيقة ، دا عشان هو " إنييستا " ، أصعب المهارات الممكنة كان بيعملها بكل سهولة وسلاسة وبأقل مجهود ممكن ، بالكورة او من غيرها كان قادر يصنع الفرق ، كمية اللقطات اللي شاهدتها لأندريس وحسيت فيها إحساس ال " أووووف إيه دا !! " غير معدودة ، كان بسيط ، لكنه كان فنان ومبدع ويخليك تستنى الكورة تروحله عشان تشوف هيعمل بيها إيه وفي كل مرة كان بيجذبك وبيبهرك اكتر من المرة اللي قبلها ، مكانش سريع لكنه كان عنده قدرة غير عادية على إستغلال أصغر مساحة ممكنة..
انييستا بالراحة كان المفروض يفوز بالكرة الذهبية ومش مرة واحدة بس الحقيقة بل في عديد المرات ، مكانش لاعب هداف لكن مع ذلك كانت معظم أهدافه في لحظات حرجة وحاسمة وتدل على شخصيته في المباريات الكبرى ، هدفه في الوقت الإضافي في منتخب هولندا في نهائي كاس عالم 2010 اللي منح المنتخب الإسباني أول بطولة كاس عالم في تاريخه وهدف الغدارة الشهير جداً في إياب نصف نهائي دوري أبطال أوروبا 2009 ، أهداف ماركة مسجلة إلى يومنا هذا ، وبالمناسبة إنييستا اللاعب الوحيد في تاريخ الكورة اللي فاز بلقب رجل المباراة في نهائي دوري الأبطال ونهائي كأس العالم ونهائي بطولة اليورو مجتمعين..
كان ليه بعض المهارات الخاصة بيه هو بس ، أبرزهم مهارة La croquta واللي بتعتمد إعتماد كبير على التركيز والقدرة على التحكم بالكرة بالقدمين ، بمجرد ما تفتكر إنك خلاص حصرته وهتفتك منه الكورة كان بيمر بكل سلاسة حتى لو في أضيق مساحة في الملعب..
علاقته بميسي مكانتش علاقة عادية بين اتنين لاعيبة والسلام بل كانت اكبر من كدا بكتير ، لما رحل إنييستا عن الفريق وإتسأل ميسي في أحد اللقاءات الصحفية عن الموضوع قال نصا " رحيل إنييستا؟ لن أفتقده فحسب، بل عالم كرة القدم سيفتقده"..
وفعلاً مكذبش لأن انييستا مش بس ساب فراغ كبير في البرسا لحد انهاردة مش عارفين يعوضوه من الناحية الفنية بل أيضاً ساب فراغ كبير في قلب كل محب وعاشق للقلعة الكتالونية ولكرة القدم بشكل عام..
عام سعيد أندريس ، عام سعيد لرسام العصر الحديث

لا يوجد تعليقات
...
عزيزي المتصفح : كن أول من يقوم بالتعليق على هذا المقال ! أدخل معلوماتك و تعليقك !!

الرجاء الالتزام بآداب الحوار
اسمك *

البريد الالكتروني *

العنوان

المعلومات المرسلة *
أدخل الكود *
أضف